Gaurkotasuna

15/09/2008

Fundazioak Ajarte eta Erdi Aroko Hirigunearen artean Harrizko Bidetik egiten ziren ibilaldiak berreskuratu ditu

Vitoria-Gasteiz, 2008ko irailaren 15a.- Santa Maria Katedrala Fundazioak eta Goiena Mendi Taldeak aurten ere lau ibilaldi prestatu dituzte Harbidetik, eta bideak Ajarte eta Arabako hiriburua lotzen ditu. Ibilaldi honen berezitasun nagusia Trebiñuko Konderriko herri horretako harrobiak Gasteizko tenplua eraikitzeko gehien erabili ziren harrien jatorria dela da.

Ajarte Trebiñuko Konderriko Udalaren barrutian dagoen herrixka bat da, ia biztanlerik gabekoa. Herri honek Gasteizko mendietatik hurbil egotearen ondorioz dauzkan ikuspegi bikainez gain, bertako harrobiak Arabako eliza ugaritako harrien jatorria izan dira, Santa Maria Katedralarenak, besteak beste.

Hori dela eta, Santa Maria Katedrala Fundazioak iaz gune biak lotzen zituen ibilaldi bat martxan jarri zuen, eta horrela, interes historiko eta artistikoa eta inguruko paisaiaren elementuak, inguruko geografia, eta bereziki, historian zehar harria Gasteizko muinora eramateko erabili ziren bideak bateratu zituen.

Aurtengoan, ibilaldiak larunbatetan egingo dira, zehazki, irailaren 20an eta 27an eta urriaren 4an eta 18an. Egun bakoitzean autobus batek partaideak Ajarteraino eramango ditu eta handik 14 kilometroko bideari ekingo diote, eta inguru naturalaz gozatzeaz gain, igarotzen diren tokiei buruzko azalpenak ere entzungo dituzte.

Ibilbidea Ajarten hasiko da, bertan, partaideei harrobi zaharrek monumentua zaharberritzeko prozesuko baliabide gisa dauzkaten berezitasunen berri emango zaie. Ajarteko muinotik eta Gasteizko Mendietatik igarotzean, harrobi zaharretako zuloak ondare arkeologiko eta historiko gisa ikusiko dira. Puntu honetan, aipatzekoa da daukaten balio naturala iparraldeko pagadi ilunengatik eta hegoaldeko amezti, erkamezti eta artediengatik.

Olarizuko eremuan, jada, Kutzemendiko kastroa dago, Araban gizakiaren arrastorik zaharrenetariko batzuk dauzkan aztarnategia, hain zuzen, baita Olarizuko Etxaldea ere. Toki hau probintzia osoan abere-bide batekin gehien lotuta dagoena da eta gaur egun aisialdirako eremu zoragarri bilakatu da.

Bukaeratik hurbil, Mendiolan, ibilaldietako partaideek Andre Maria Birjinaren Zeruratzearen Eliza ezagutuko dute. XVI. eta XVII. mendeetan eraikitako tenplu interesgarria da, estilo errenazentista berantiarrekoa, gurutze latindar formako oinplanoa dauka eta deigarriena bere aurrealdeko ateburua da. Ibilbidea Gasteizko Santa Maria Katedralean eta hiriko harresian bukatuko da. Gainera, ibilbide osoan parte hartzen dutenek tenplua doan bisitatu ahalko dute.

Jardueran parte hartu nahi dutenek tokia erreserbatu beharko dute katedraleko Bisitariei Harrera egiteko Zentroan edo 945 255 135 telefono zenbakira deituz. Irteera bakoitzaren kostua 5 eurokoa izango da, Katedraleko Sortzaileen Zirkuluko bazkideen taldearentzako izan ezik, izan ere, horientzako doan izango da. Ibilaldi bakoitzean 45 toki egongo dira eskuragarri. Irteerak hiriko bi puntutatik egingo dira. Autobusa Lovaina Plazara 8:30ean eta Mendizorrotzako pilotalekuetara 8:45tan joango da partaideak jasotzera eta Goiena Mendi Taldeko monitoreekin joango dira. Santa Maria Katedralera 14:00etan iristea aurrez ikusten da.

Halaber, asteburuan Hirigune Historikoan egongo den Erdi Aroko Azoka dela eta, irailaren 27an harria Ajartetik nola ekartzen zuten gogoraraziko da. Horretarako, bi idik tiratutako gurdi batek eguerdiko 12:00etatik Mendiola eta Santa Maria Katedralaren arteko bidea egingo du eta harrizko bloke batzuk herrestatuko ditu. Oso jarduera erakargarria egun horretan Erdi Aroko arbendol formako hirigunea bisitatzera etorriko direnentzako.