11/09/2008
Vitoria-Gasteiz,
2008ko irailaren 11.- José Luis Corral idazle eta
historialariak eleberri historikoaren arrakasta “jendeak literaturaren
bitartez historia ezagutzeko daukan interesa eta nahia”ri egotzi dio
eta horrez gain, irakurleek gertakizun historikoa “manipulazio edo
aldaketarik” gabe irakurri nahi dutela ziurtatu du. Corralek gaur
arratsaldean Santa Maria Katedralean hitzaldi bat emango du.
José Luis Corralek gaur arratsaldean Santa Maria Katedrala Fundazioak
antolatutako “Katedralaren inguruko topaketak” zikloaren denboraldi
berriari hasiera emango dio. Hitzaldiaren izenburua “Irudikatutako Erdi
Aroa. Katedral gotikoak eleberri historikoan” izango da eta 20:00etan
hasiko da tenpluko arkupean. Aragoiko idazle eta historialariak hasiera
emango dio Gasteizko tenpluak eleberri historikoari buruz egin nahi
duen ziklo honi.
Bere lankide eta laguna den Toti Martínez de Lezeak aurkeztuko du eta
Corralek gaur hiru pribilegioz gozatuko duela eta (hau da, Gasteizen
egotea, Santa Maria Katedralean lagunartean egotea, eta jendeari
katedral gotikoei buruzko istorioak kontatu ahal izatea) pozik zegoela
adierazi zuen. Gasteizko tenpluan azkenekoz duela bi urte egon ondoren,
bisita gidatuen programa “ondarearen kudeaketaren alorreko proiektu
iraultzaile” bat zela adierazi zuen, izan ere, “jendeak hesien barruko
aldetik obrak ikusi ahal izateko aukera ematen baitu” eta gainera,
“guztion diruarekin zer egiten ari diren ikusteko aukera ere ematen du”.
Corral idazle izateaz gain,
Erdi Aroko Historia irakaslea eta Historia Tailerraren zuzendaria da
Zaragozako Unibertsitatean eta gaur arratsaldean emango duen
hitzaldian, zergatik hasi ziren XII. mendeko bigarren erdian katedral
gotikoak eraikitzen azalduko du, eta horrez gain, intelektualek beren
prestakuntza aprobetxatuz, eraikinen bitartez mundua ulertzeko moduan
eragin zutela kontatuko du, eta historiagileek eta eleberri-idazleek
eleberriaren bitartez katedral bat zer den nola azaltzen duten argituko
du.
Salmenten zerrendetako lehenengo postuetan liburu asko dituela ikusita,
eleberri historikoak azken urteotan geure herrialdean bizi duen
goieneko uneari buruz galdetu ziotenean, Corralek historialari askok
“denbora luzez ongi idazteari uko egin” diotela adierazi zuen. Bere
ustez, “batzuk ongi idazteaz kezkatu dira, baina zati batean soilik,
eta modu manipulatuan idatzi dute, gertakizunak aldatu dituzte eta
irakurlea nahita nahasi dute”. Hori dela eta, bere ustez, jendeak
literaturaren bitartez historia ezagutu nahi du, baina manipulaziorik
gabe.