07/05/2009
Vitoria-Gasteiz, 2009ko
maiatzaren 7a.- Santa Maria Katedrala Fundazioak
maiatzaren 9an, larunbata, berriro ekingo dio ‘Kontzertuan eta irekita’
zikloari Daniel Oyarzabalen kontzertuarekin. Musikari gasteiztar
ospetsuak bi teklatu dauzkan klabe alemaniar batekin Johann Sebastian
Bach-en teklatu lanik ezagunena den ‘Goldberg Variazioak’
interpretatuko du. Kontzertua arratsaldeko 20:00etan hasiko da
arkupean. Dohainik izango den arren, beharrezkoa izango da gonbidapena
eskuratzea.
Oyarzabalek klabe eta organo
espezialitateetan ikasketa bukaerako ohore saria lortu zuen.
Ikasketekin Vienako Goi Musika Eskolan jarraitu zuen Thomas
Schmögner-ekin, baita Hagako Errege Kontserbatorioan eta musikaririk
onenekin batera ere. Horrez gain, hainbat sari lortu ditu lehiaketetan,
adibidez, 1998an Erromako Nazioarteko Musika Lehiaketan
Inprobisazioaren arloko Lehen Saria eta 2002an, Nijmegen-go (Holanda)
Nazioarteko XIX. Lehiaketako Hirugarren Saria lortu ditu.
Nazioarteko jaialdietan parte hartu ohi du, bai bakarlari gisa, bai
kontinuista gisa eta kontzertuak eman ditu Europa osotik eta Japonian.
Azpimarratzekoak dira Milango Festival Due Organi in Concerton,
Copenhagueko Orgelkonzert Nazioarteko Zikloan, Vienako Organo Jaialdian
eta Amsterdamgo Orgel Nazioarteko Jaialdian bakarlari gisa gauzatutako
parte-hartzeak.
Halaber, Oyarzabalek euskal musika garaikidearen hedapenean
parte hartu ohi du, baita egungo konpositoreen lanen estreinaldietan
ere. 2000. urtetik Gasteizko Nazioarteko Organo Jaialdiko zuzendari
artistikoa da. Jaialdi hori nazionalitate desberdinetako organo-jole
gazteak bultzatu eta babestera bideratuta dago.
Santa Maria Katedraleko arkupean egingo duen ikuskizunean ‘Goldberg
Bariazioak’ lana, hots, Johan Sebastián Bach-en teklatu lanik ezagun
eta arrakastatsuena, interpretatuko du, gaur egun musika klasikoaren
zaleek gustukoen duten lanetariko bat, alegia. ‘Goldberg Bariazioak’
aria izeneko lan batek, 30 bariaziok eta Ariaren errepikapen batek
osatzen dute. Guztiak lotzen dituena ez da melodia komun bat,
etengabeko atzeko soinu harmoniko bat baizik. Oyarzabalek bi teklatuko
klabe alemaniar batekin interpretatuko du programa hau. Christian
Müller-en 1738ko klabe alemaniar baten kopia bat da, Andrea Restellik
2004an egina.
Kontzertu hau
doakoa izango da eta Katedraleko arkupeetan egingo da arratsaldeko
20:00etan. Toki kopuru mugatua dagoenez, beharrezkoa izango da
gonbidapenak Bisitarien Harrera Zentroan (Buruileria Plazan) jasotzea.