09/07/2009
Vitoria-Gasteiz,
2009ko uztailak 9.- Santa Maria Katedraleko dorrea berriro
bisitatu ahal izango da bihartik aurrera. Lanengatik ia 4 hilabete
itxita eman ostean, talaiaraino igo ahal izango da hiriaren eta baita
Lautadaren gaineko ikuspegi zoragarriez gozatzeko. Gainera, oraingo
honetan gorago, erlojuaren mailaraino igo ahal izango da.
Duela urtebete “obretan eta irekita”
egitarauan beste bisita bat gehitu zitzaien Santa Maria Katedraleko
bisita-gidatuetako ibilbideei. Garai hartan, eta lan materialak
igotzeko jarritako karga-jasogailuari esker, ekimen arrakastatsua jarri
zen abian; horri esker, ehunka bisitarik hiriaren gaineko lekurik
altuenaz gozatu ahal izan zuten.
Urte hasieraz geroztik itxita izan da, besteak beste, zorua egonkortu
eta harria forjatu zein garbitzeko; ostirala bihartik aurrera, berriro
abiaraziko dute ekimen hau ostiral arratsalde, asteburu eta
jaiegunetan, eraberritze-lanei trabarik ez egitearren.
Karga-jasogailua egokituta
dago eta uneoro Fundazioko gida eta langileez lagunduta joango diren
bisitarien segurtasuna bermatzeko exijitutako prebentzio-neurriak
betetzen ditu. Hamar eta hamabi lagun arteko taldeak izango dira.
Ostiral arratsaldez bisitatu ahal izango da 16.45, 17.45 eta 19.00tan.
Asteburu eta jaiegunetan, iluntzeko bisita-ordu hauez gain, 10.45,
12.15 eta 13.15tan ere igo ahal izango da. Gutxi gora behera 40 minutu
iraungo ditu bisitak eta lagun bakoitzeko 5 euro ordaindu beharko dira.
Segurtasun arrazoiak tarteko, 12 urtez beherako haurrek ezin izango
dute igo eta derrigorrezkoa izango da bisitariek oinetako itxiak
eramatea.
Lehen bezala, igogailua lehenengo
kanpandorreraino iritsiko da, 30 metroko altueran: hortik zorua nola
berregin duten begiztatu ahal izango da, baita XIX. mendeko suteak oso
hondatua utzi zuen zuraren-forjaketa ere; gainera, harria garbitu dute
eta ipar-ekialdeko eta ipar-mendebaldeko arkuak zabaldu dituzte
norabide guztietako ikuspegia erraztearren.
Bisitak, ordea, eraberritutako barne-eskailera batetik gora bigarren
kanpandorreraino edo erloju-mailaraino igotzea ahalbidetuko du. 45
metroko altueran kokatua, zorua nola berregokitu duten eta aurrez
zabalik zeuden 3 arkuez gain, itxita zeuden beste bost nola zabaldu
dituzten ikusi ahal izango du bisitariak hortik. Bertan, kariloia eta
erlojuaren makineria jarri nahi dituzte aurrerantzean. Gainera, lanek
aurrera doaz eta etorkizuneko asmoen artean, mugikortasun urritasuna
duten pertsonentzako barne-igogailua jartzea nabarmendu liteke.