23/07/2009
Vitoria-Gasteiz, 2009ko
uztailaren 23a.- 8 eta 11 urte bitarteko hirurogei
neska-mutilek artea, historia eta arkitektura ikasi dute eta aldi
berean ondo pasatu dute Santa Maria Katedrala Fundazioak antolatu
dituen eskulan-udalekuetan. Astebetez talde bakoitzak
katedrala eta harresia bisitatu du, kanpaiak egin ditu, arkeologoekin
hitz egin du eta ikusi du nola zaharberritzen den eraikin gaixo bat.
Bihar, ostirala, amaitu egingo da Santa María Katedrala antolatutako
umeentzako udalekuen hirugarren eta azken txanda. Parte-hartze aldetik
arrakasta handikoak izan dira. Horrela bada, lehenengo edizio honetan
udalekuek bost egun iraun dute, astelehenetik ostiralera 10:00etatik
13:00ak arte, talde hirurak osatu dira eta eskainitako leku guztiak
bete dira.
Tailerrak elebidunak izan dira eta umeek katedralaren zenbait puntu
bisitatzeko aukera izan dute. Katedralean ibili ondoren, zenbait
jarduera plastiko burutu dituzte; horrela, tenpluaren arazoak
ezagutzeaz gain, bertan egiten den lana eta ondarea zaintzearen
garrantzia ikasi dute. Gainera, sormena eta irudimena landu dute, eta
etxera egindako lanak eraman dituzte, katedralean egon diren bost egun
horiek oroitzeko.
Fundazioko monitoreen laguntzarekin, umeek jolastu dute eta
katedralaren logotipoa daukan kamiseta bat egin dute; hori izan da aste
guztirako izan duten uniformea eta kamiseta horrekin bereizi dute beren
taldea. Gainera, Fundazioko zuzendari Juan Ignacio Lasagabasterrekin
hitz egin dute; zuzendariak zaharberritzeko lanei buruzko azalpenak
eman dizkie. Obran bertan diren teknikari eta arkeologoekin ere hitz
egiteko aukera izan dute. Erdi Aroko harresitik berreskuratu
den tartean ibili dira eta beren harresia egin dute material birziklatu
batzuekin; elizpeko polikromiak irudikatu dituzte eta haiek nahi izan
duten moduan margotu dituzte. Kanpaigile izatera jolastu dute; euren
kanpaia egin dute eta horri izena jarri diote.
Laburbilduz, oso esperientzia aberasgarria izan da, bai parte hartu
duten umeentzat, bai ume horiekin lan egin duten Fundazioko
langileentzat; beste edizio batzuk ere burutuko ditugu.