31/07/2009
Vitoria-Gasteiz, 2009ko
uztailaren 31.- Abuztuan zehar, Vitoria-Gasteizko Erdi
Aroko harresian, ipuin kontalari batek haurrei eta txikienei hiriaren
historia kontatuko die modu jostagarri eta dibertigarrian. Saioak
doakoak izango dira eta ipuinak euskaraz eta gaztelaniaz izango dira.
Vitoria-Gasteizko Hirigune Historikoa Era Integralean Biziberritzeko
Agentziak, Santa Maria Katedrala Fundazioaren elkarlanarekin,
abuztuaren 5ean ekimen berritzaile bat abiaraziko du; ekimen horren
helburua txikienei hiriaren historia eta Erdi Aroko harresiaren
historia irakastea da.
“Clowntacuentos” taldeak txotxongilo emanaldi dibertigarria egingo du:
emanaldiek 45 minutu iraungo dute eta 4 eta 9 urte bitarteko haurrei
zuzenduta egongo dira, nahi duten guztiek bertaratzeko aukera badute
ere. Erdi Aroan harresia eraiki zuten garaiko jantziz hezurmamitutako
hamar bat pertsonaia erabiliz, Gasteizko herrixkaren historia kontatuko
dute, herrixka nola zabaldu zen eta alde zaharra ixten zuen harresia
nola eraiki zuten azalduz. Hori egin ahal izateko, hiru agertoki
erabiliko dituzte eta bertan azalduko dira pertsonaiak, Herminia, Telo,
pregoilaria, eraikitzaileak, sorgina edo bertako biztanleak, besteren
artean.
Ipuin kontalaria harresien sarreran dagoen lorategian izango da,
txikienak zelaian eroso eser daitezen, abuztuaren 5, 8, 22 eta 29an.
Egun horietan bi saio izango dira, lehena 12:30ean gaztelaniaz eta
bigarrena 18:00etan euskaraz.