23/09/2009
Vitoria-Gasteiz,
2009ko irailaren XX-(e)an.- Santa Maria Katedrala zaharberritzeko
proiektua Espainiako turismoaren arloko berrikuntza eredu izendatu dute
eta TVEk herrialde honen aurrerakuntzak eta garapena erakusteko egiten
ari den kapituluetako baten protagonista izateko aukeratu du.
"+DEspaña" izenburuko proiektu hau gauzatzeko, TVE 32 kapituluko
dokumental sorta bat filmatzen ari da herrialde osotik. Kapitulu
bakoitza 50 minutukoa izango da eta TVE2 telebista katean igorriko dute
urte bukaera baino lehen, baita Nazioarteko Katean ere. Dokumental
hauen helburua eskualdeek eta hiriek hainbat alderditan (adibidez,
zerbitzuak, ingurumen baliabideak, osasuna, industria, azpiegiturak,
turismoa, kultura, etab.) jasan duten bilakaera erakustea da.
Santa Maria Katedralari dagokionez, berrikuntza turistikoaren eredu
gisa hautatu dute “Irekita eta Obratan proiektuagatik eta horrek
Gasteizen kultura eta turismo proposamen berritzaile gisa eragin eta
sustatu dituen jarduera paralelo guztien ondorioz (teknologia berriak
aplikatzea, abangoardiako jarduerak, historia, ondarea eta kultura
berrikuntzarekin bateratzea)”.
Arabako hiriburura etorri zen ekipoa tenpluaren bihotzetik ibili zen
Juan Ignacio Lasagabasterrekin, Santa Maria Katedrala Fundazioaren
gerentearekin, alegia. Hark urtero milaka pertsonak bisitatzen duten
XIII. mendeko eraikin honen txoko guztiak erakutsi zizkien. Elkarrekin
hiriaren jatorriari buruz hainbeste datu eskaini dituzten indusketa
arkeologikoak bisitatu zituzten, triforiotik eta ingurabidetik ibili
ziren eta handik, eraikinak hasieran zuen gotorleku funtzioaz ohartu
ziren. Horrez gain, arkupea zaharberritzeko egin diren lanak ikusi
ondoren, hasieran nolakoa zen ezagutzeko aukera izan zuten, zehazki,
argizko polikromien proiekzioaren bidez, koloreek XVI. mendetik izan
duten bilakaeraz gozatu zuten.
Aipatzekoa da ere Eusko Jaurlaritzaren Industria Sailak ekimen honetan
parte hartu duela.